ich wünsch allne e fröhlichi und bsinnlichi wiehnachtsziit.

en typische samschtig...

am 9 isch tagwach, ahlegge, zmorge ässe, chuchi mache, schnäll ufs dach e maschine wösch ufhänke, zum hus us und uf de wuchemart, noch em mart en kafi trinke bim chines, wider hei und gmües, frücht, usw. versorge. am guet 12 gits en liechte zmittag, no meh chuchidienscht, churzi pause i de stube zum nochrichte lose, siesta = 1 stund uf em dach i de sunne ligge, di trocke wösch wider abhen, zämmelegge und versorge, en spaziergang mache und uf em heiwäg no im lidl verbi, schwärbelade heitschümpele, alles poschtizüg versorge, teigschüssle füreneh und zuetate abwäge und chnete. d'fritierpfanne ufheize, de teig uswalze und zueschnide, schlüferli fritiere, chuchi ufrumme. mittlerwil isch zit zum znacht mache. härdöpfel schelle, i würfeli schnide und brötle, tomate ischnide, brokkoli rüschte und beides im salzwasser choche, en fulwiber suppebütel amache und ganz z'letscht drü schibe tunfisch superchurz und superheiss brötle. en guete!
und eso gsend di fertige schlüferli us...

und no meh...

üsers vogelhüsli hät unerwünschte bsuech übercho... en ratz, wo sich gnüsslich sin buch mit em brot vollgschlage hät!

wider emol...

öppis. z'spanie isch alltag, genauso wie z'island und sicher susch überall au...
am samschtig vonere wuche simmer wie immer am mart gsi. han am gmüesstand grüeni bohne kauft, oder komischi grüeni würm, nöd mini wort! letsch wuche hani dänn mine lüt bohne, späck und härdöpfel zum znacht gmacht. isch guet acho. nochdäm das funktioniert hätt, hani dä samschtig am mart e zugetti kauft. hüt znacht häts hackchügeli i bruner sossa, härdöpfelstock und brötleti zugettischibe geh, isch au guet acho. emol luege was i nöchschte samschtig a "komischem" gmües am mart find.

wäh...

de erschti schnee! hütt nacht hätts bis is dorf abe gschneit. ez rägnets und schneits, e richtigs hudelwätter, zum glück hani kain hund wo usi mues. für hüt obed isch schturm agseit. i bi am überlegge was i alles im gfrührer ha für z'nacht, ha kai luscht in lade z'laufe.

do chammer aluege was i de summer eso alles glismet ha... und s'meischte isch verchauft.
http://www.facebook.com/album.php?aid=89467&id=546842295&l=2e592fc8de

no...

sälbergmachter cha min zmittag gär nümme wöre...
sälberbachni bürli mit sälberkochtem johannisbeerschlee, sälberbachete chueche und im gonfiglas isch öpfelgrütze vom geschtrige znacht.

wider emol öppis ...

vo mim arbeitsplatz.

vor 2 wuche...

han i bim summerhus es vogelnäscht mit 7 ganz chline eier gfunde. leider han i do de fotiapparat dehei vergässe. das wuchehend han en mit. mittlerwile sind 6 hungrigi vögeli im näscht. e stimm händs no keini. es sind wiesenpieper (anthus pratensis)

es blubberet...